Bakının Şüvələn qəsəbəsinin sakini, 1965-ci il təvəllüdlü Alik Qafarov gecə saatlarında döyülərək müxtəlif bədən xəsarətləri alıb.

Bu barədə "İslamazəri"-yə “Beynəlxalq Əlillər Cəmiyyəti” İctimai Birliyinin sədri Tahir Xuduyev məlumat verib.

O, deyib ki, kömək üçün “Beynəlxalq Əlillər Cəmiyyəti” İctimai Birliyi və “Əlillər Dünyası” qəzetinə müraciət edilib. Hər iki təşkilatın əməkdaşları tez bir zamanda Alik Qafarovun köməyinə çataraq təcili yardım maşını ilə onu Xəzər rayonundakı 26 saylı xəstəxanaya çatdırıblar. Lakin növbətçi həkim bəhanələr gətirərək pis vəziyyətdə olan 1-ci qrup əlili xəstəxanaya qəbul etməyib. Sonra əməkdaşlarımızın köməkliyi sayəsində Alik Qafarov Sabunçu Rayonu 3 saylı Xəstəxananın travmatologiya şöbəsinə qəbul edilmişdir.

Tahir Xuduyev bildirib ki, Alik Qafarov 1977-ci ildə 11 yaşında olarkən elektrik qatarının altına düşərək hər iki ayağını və sağ əlilin bir neçə barmağını itirib. Buna görə də həmin vaxtdan 1-ci qrup əlil olub. Hər iki ayağının olmamasına baxmayaraq o, çox istedadlı bir insandır.

Hətta Alik 1-ci qrup əlil ola-ola Azərbaycanımızın ərazi bütövlüyü uğrunda gedən döyüşlərdə iştirak etmək üçün 1993-cü ildə könüllü olaraq Əzizbəyov batalyonunun tərkibində Tərtər rayonuna da yollanıb.