Şirkət rublda həddindən artıq dalğalanma olduğu üçün Rusiyadakı tək onlayn satış ünvanı olan mağazasını müvəqqəti olaraq bağlayıb.

Dünyanın texnologiya nəhənglərindən olan "Apple" məsələ ilə bağlı şərh verib. Şirkətdən bildirilib ki, bu vəziyyət məhsul qiymətləri ilə bağlı araşdırmalar başa çatana qədər davam edəcək.

"Apple" məhsullarının ölkədəki tək satış ünvanı olan internet saytında (www.store.apple.com/ru) isə istifadəçilər üçün bir mesaj yayımlayıb: ""Apple" mağazasını sizin üçün təzələyirik. Qısa bir müddət sonra təkrar fəaliyyətə başlayacağıq".

"Apple"ın maliyyə direktoru Luka Maestre bildirib ki, rublun dəyərdən düşməsindən zərər çəkirlər və bunun qarşısını almaq üçün bir proqram tətbiq ediləcək. 

Qeyd edək ki, şirkət rubldakı dəyər itkisinə indiyə qədər məhsullarının qiymətini artıraraq cavab verməyə çalışmışdı. "Apple"ın bazara sentyabr ayında təqdim etdiyi "iPhone 6"nın Rusiyadakı qiyməti bir ayda 25 % bahalaşıb. (anspress)