İslamazeri.az-ın "Al Arabiya" telekanalına istinadən verdiyi xəbərə əsasən, İraqın paytaxtı Bağdad şəhərinin ətrafında baş vermiş bir neçə partlayışda azı 2 nəfər həyatını itirib, daha 11 nəfər isə yaralanıb.

"Hazırda 2 ölü və 11 yaralı var.", - deyə şəhər polisinin təmsilçisi bildirib.

Partlayışların hədəfi müəyyən edilməyib. Polisdəki mənbədən bildiriblər ki, şiələrin yaşadığı Bağdadın Mədinət əs-Sədr məntəqəsinin 3 rayonunda minaatan və raket atəşə tutulması qeydə alınıb.

Partlayışlar on minlərlə şiə Kazımeyn şəhəri ətrafında İmam Muhəmməd Təqi (ə)-ın şəhadətini qeyd etmək üçün yığışan zaman baş verib.

Qeyd edək ki, 2 gün əvvəl də içində 3 ton partlayıcı maddə olan yük maşını aşkarlanmışdı. Avtomobil bu gün, İmam Muhəmməd Təqi (ə)-ın şəhadəti günündə Kazimeyndə partladılmalı imiş. Bağdad polisi maşını dünən aşkar edib və sürücüləri həbs edib. Hesablamalara görə, əgər bu maşın partladılsaydı bir kvartal yerlə-yeksan olardı. İndiyə qədər Bağdadda hələ belə ağır yüklü mina quraşdırılmış maşın tapılmayıb.