Ötən gün saat 14 radələrində paytaxtın Nəsimi rayonu ərazisində yerləşən 1 saylı körpələr evinin qarşısında yeni doğulmuş körpə tapılıb. 

Baş Prokurorluğun mətbuat xidmətindən verilən məlumata görə, tapılan qız usağına körpələr evində təcili tibbi yardım stansiyasının həkimləri tərəfindən müvafiq tibbi yardım göstərilib.

Həkimlərin səyinə baxmayaraq körpənin həyatını xilas etmək mümkün olmayıb.

Faktla bağlı rayon prokurorluğunda Cinayət Məcəlləsinin 124-cü (ehtiyatsızlıqdan adam öldürmə) maddəsi ilə cinayət işi başlanıb.

Hazırda iş üzrə zəruri istintaq tədbirləri davam etdirilir.