haberL haberR

Bu rayonunun şagirdlərinin 47 faizi ana dilindən "2" alıb

Kateqoriya: Elm-təhsil Yayımlama tarixi: 25.06.2015 18:31:18

Tələbə Qəbulu üzrə Dövlət Komissiyası bölgələr üzrə imtahan nəticələrini açıqlayıb

İslamazeri.az Azadlıq Radiosuna istinadən xəbər verir ki, Sabirabadlı şagirdlərin 47 faizi ana dili, 50 faizi isə riyaziyyatdan “2” alıb. Daşkəsən rayonunda bu nəticə müvafiq olaraq 44 və 49 , Ağcabədidə 39 və 46 faizdir. Bu siyahını Gədəbəy və Hacıqabul rayonları davam etdirir. Gədəbəydə 2 alanlar müvafiq olaraq 41 və 37, Hacıqabulda isə 36 və 44 faizdir.

Ən yaxşı nəticənisə Naftalan və Naxçıvan şəhərləri göstərib. Naftalan şəhərində 11-ci sinif şagirdlərinin 39 faizi ana dilindən, 47 faizi riyaziyyatdan “5” alıb. Bu nəticə Naxçıvan şəhərində 39 və 35 faizdir. Şahbuz rayonunda bu nəticə 38 və 33, Mingəçevirdə isə 31 və 23 faizdir. Qubadlı rayonu da ən çox “5” alanlar siyahısındadır. Bu rayonda 11-ci sinif şagirdlərinin 28 faizi ana dili, 21 faizi isə riyaziyyatdan “5” alıb.

Rayonlar üzrə builki nəticələr ötən illərdəkindən elə də fərlənmir. Aşağı nəticə göstərən bölgələr əsasən aran rayonlarıdır.

Təhsil üzrə ekspert Nabatəli Qulamoğlu bu rayonlarda təhsilə marağın aşağı olmasını sovet dövrünün ənənəsi hesab edir: “Sabirabada gəlincə... belə aran rayonlarında təhsilin səviyyəsi adətən aşağı olur. Tək-tük rayonlarda bir az fərqlənə bilər. Məsələn, Biləsuvar rayonunda bir ara müəyyən səviyyədə riyaziyyatdan uşaqlar yaxşı nəticə göstərirdilər. Bu cür aran rayonlarının sayı çox azdır. Bu da sovet dövründən qalma tendensiyadır. O vaxtlar bu rayonlarda insanların dolanışıq problemi yox idi. İnsanlar yaşamaq üçün çətinlik çəkmirdilər deyə, təhsilə önəm vermirdilər.

Ancaq, dağ rayonlarında hər kəs bilirdi ki, həyatda nicat yolu oxumaqdadır. Uşaqlar yüz cür əziyyətlə oxuyurdu ki, gələcəkdə özlərinə gün ağlaya bilsinlər. Bu yaxşı tendensiya dağlıq rayonlarda da artıq itmək üzrədir. Ancaq, aran rayonlarındakı mənfi tendensiya təəssüf ki, hələ də davam edir”.

Nabatəli Qulamoğlu dağlıq rayonlardakı yaxşı ənənənin get-gedə azalmasını cəmiyyətdə baş verən dəyişikliklə izah edir: “Mənim yadımdadır Lerik rayonunun bir ucqar kəndində orta məktəbi bitirmiş 23 şagirddən 22-si ən yüksək fakultələrə qəbul olunmuşdu. Cəmiyyətin əxlaq infrastrukturu dəyişdiyindən, indi bu ənənə itibdir. İndi savadla özünə yer tapmaq çox çətindir. Əgər, “Həsənağa”nın qohumusansa, savadın oldu- olmadı iş tapacaqsan. Belə deyilsə, çox çətindir. Sən yalnız yüksək savadla bu cür adamların köməkçisi işləyə bilərsən. Ucqar rayonlardakı yaxşı ənənə bu səbəblərdən əhəmiyyətini itiribdir”.

Ekspert hesab edir ki, bununla yanaşı aşağı nəticələrə səbəb həm də təhsil sistemindəki çatışmazlıq və qüsurlardır.

 
Yayımlanan xəbərlərin bütün haqları “İslamazeri” İnternet Qəzetinə aiddir. İstinad edilmədən məlumatların, video və fotoların götürülməsi qadağandır.
© Copyright 2006 İslamazeri.az - "İslamazeri" internet qəzeti. Bütün hüquqları qorunur.
İcazəsiz və mənbə göstərilmədən yayımlana bilməz.