Prosesi izləyən Meydan TV əməkdaşının məlumatına görə, hakim Elmar Rəhimovun sədrliyi ilə keçən prosesdə futbolçunun anası Xalidə Hacıyeva və mərhum jurnalist Rasim Əliyevin anası Teyfurə Əliyevə şahid qismində ifadə veriblər.

Xalidə Hacıyeva baş verən hadisədə oğlunun günahkar olmadığını deyib. Onun sözlərinə görə, Cavid Hüseynov hadisədən sonradan xəbər tutub. Teyfurə Əliyeva isə deyib ki, Rasim Əliyevi aldadıb çay içmək adı ilə evdən aparıblar. Anasının sözlərinə görə, Rasim Əliyev görüşə getməzdən əvvəl Cavid Hüseynovla Elşən İsmayılov ona bir neçə dəfə zəng ediblər: "Cavidin bu işdə günahı yoxdursa, niyə xəstəxanaya - Rasimin yanına gedib?!"

Prosesdə Cavid Hüseynovun əmisi oğlu Nihad Abbaslı və polis əməkdaş Ədalət Məmmədov da ifadə verib. Ədalət Məmmədov ifadəsində bildirib ki, onlar Cavid Hüseynovu Şamaxıdan Bakıya gətiriblər. Nihad Abbaslı isə Cavidlə hadisənin ertəsi günü Whatsapp-da yazışdığını deyib və Cavid ona Elşənə polisə təslim olmalı olduğunu dediyini yazıb.

Proses aprelin 13-də davam etdiriləcək.

Cavid Hüseynov jurnalist Rasim Əliyevin ölümü ilə bağlı təqsirləndirilir. Bu iş üzrə təqsirləndirilən şəxslərə hökm oxunub. Həmin cinayət işinin materiallarından Cavid Hüseynovun Cinayət Məcəlləsinin 307.1 (ağır cinayətin hazırlanması və törədilməsini bilərək həmin cinayət barəsində xəbər verməmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilməsinə dair hissə ayrıca icraata verilib.