haberL haberR

Ədliyyə naziri Avropa Şurasının nümayəndəsi ilə görüşdü

Kateqoriya: Siyasət Yayımlama tarixi: 14.05.2015 10:45:37

Ədliyyə naziri, Məhkəmə-Hüquq Şurasının sədri Fikrət Məmmədov Avropa Şurası İnsan Hüquqları və Qanunun Aliliyi üzrə Baş Direktorluğu Ədliyyə və Hüquqi Əməkdaşlıq Departamentinin rəhbəri xanım Hanne Yunker ilə görüşüb

Ədliyyə Nazirliyinin mətbuat xidmətindən islamazeri.az-a verilən məlumata görə, Avropa Şurası ilə səmərəli əməkdaşlığı qeyd edən nazir bu mötəbər qurumun Azərbaycan üçün 2014-2016-cı illər üzrə qəbul olunmuş Fəaliyyət Planının uğurla həyata keçirilməsini vurğulayıb, ölkə Prezidenti cənab İlham Əliyevin rəhbərliyi ilə aparılan məhkəmə-hüquq islahatları, o cümlədən məhkəmə infrastrukturunun müasirləşdirilməsi, elektron məhkəmənin tətbiqi, hakimlərin tədrisi barədə məlumat verərək bu sahədə qarşılıqlı fəaliyyətə dair geniş perspektivlərin olduğunu söyləyib.

Avropa Şurasının ölkəmizlə hüquqi sahədə, o cümlədən Ədliyyə Nazirliyi ilə əlaqələrindən məmnunluğunu bildirən qonaq Ədalət Mühakiməsinin Səmərəliliyi üzrə Komissiyası (CEPEJ) ilə uğurlu əməkdaşlığı, Azərbaycan nümayəndəsinin CEPEJ-in rəhbər orqanında təmsilçiliyini yüksək qiymətləndirib.

Xanım H.Yunker son illər respublikamızda aparılan məhkəmə-hüquq islahatlarını, bu sahədə qanunvericiliyin təkmilləşdirilməsini, infrastrukturun müasirləşdirilməsini və İKT-lərin tətbiqini təqdir edərək məhkəmə sisteminə, o cümlədən hakimlərin tədrisinə maliyyə ayırmalarının səviyyəsini Avropada öncül dövlət kimi dəyərləndirib və ölkəmizin əldə etdiyi müsbət təcrübənin digər dövlətlərə yayılmasının əhəmiyyətini vurğulayıb.

Görüşdə, həmçinin əməkdaşlığın prioritetləri, o cümlədən Fəaliyyət Planı çərçivəsində məhkəmə fəaliyyətinin səmərəliliyinin artırılmasını, Məhkəmə-Hüquq Şurası və Ədliyyə Akademiyasının potensialının gücləndirilməsini əhatə edən birgə layihə ətrafında faydalı fikir mübadiləsi aparılıb.

Yayımlanan xəbərlərin bütün haqları “İslamazeri” İnternet Qəzetinə aiddir. İstinad edilmədən məlumatların, video və fotoların götürülməsi qadağandır.
© Copyright 2006 İslamazeri.az - "İslamazeri" internet qəzeti. Bütün hüquqları qorunur.
İcazəsiz və mənbə göstərilmədən yayımlana bilməz.