2014-cü ildə E.Hüseynovun atası Sabir Hüseynov da dünyasını dəyişdi. Mərhum jurnalistin ölümündən qısa müddət sonra onun həyat yoldaşı Ruşaniyyə Hüseynova oğlu Aslanla birgə Norveçə mühacirət etdi. Hazırda E.Hüseynovun ailəsi adına ölkədə bacısı və qardaşı qalıb. 

 

E.Hüseynovun atası Sabir Hüseynov son müsahibələrində oğlunun qatili tapılmayınca dünyasını dəyişmək istəmədiyini deyirdi. Onun sözlərinə görə, qatillərin kim olduğunu hamı bilsə də, heç kim açıqlamır: “Hamısını bilirəm, kimdir, nədir. Amma əmələ gəlmir. Hamı bilir, deyən yoxdur. Eynulla gedib Gürcüstanda həmin adamları tapdı. Onu da tutdular dama saldılar, 4 il 3 ay yatdı. Dəqiq deyən yoxdur, kimlərdir. Ancaq heç kim də tutulmayıb. Bilirik kimdir, nəçidir. Ancaq durub neyləyəcəm bundan sonra? Siz məndən də yaxşı bilirsiniz. Niyə tuturlar axı? Özlərini tutası deyillər ki. Öz-özünü tutan adam varmı? Nə isə, əvvəl-axır açılacaq, vaxt lazımdır”. 

 

Ötən il işin istintaqını aparan artıq ləğv edilən Milli Təhlükəsizlik Nazirliyində (MTN) baş verən inqilabi olaylar oldu. Adı tez-tez jurnalistlərə qarşı zorakılıq hadisələrində hallandırılan MTN polkovniki Akif Çovdarovun işdən çıxarılması, ardınca isə həbsi E.Hüseynov cinayətini yenidən gündəmə gətirdi. 

 

Heç kimə sirr deyil ki, 2005-ci ildə “Monitor” jurnalının baş redaktoru Elmar Hüseynovun qətlə yetirilməsi zamanı A.Çovdarovun adı hallandırılırdı. Bu versiyanı səsləndirənlərdən biri də virtualaz.org saytının baş redaktoru Eynulla Fətullayev idi.

 

Və bu  gəlişmədən sonra istər-istəməz E.Hüseynovun qətlinin açılmasına ümidlər artdı. Çünki qətlin sifarişçisi kimi adı hallandırılan A.Çovdarovun cinayət əməllərində  E.Hüseynovun qətlinin də yer alacağı ehtimallar sırasındadır. 

 

“Qanun” nəşriyyatının direktoru Şahbaz Xuduoğlu hesab edir ki, ləğv edilən MTN-də aparılan islahatlar bu məsələyə mütləq öz təsirini göstərəcək. Amma müsahibimiz bunun tez bir zamanda olacağını ehtimal etmir: “Elmar Hüseynov məsələsi ikinci mərhələdə olacaq. Ümumiyyətlə isə hər hansı islahat, yenilik ümid yaradır ki, Elmar Hüseynov və digər siyasi qətllərin üstü açıla bilər. Bura Elmar Hüseynovun qətli də daxildir, Rafiq Tağının qətli də. Çünki bu işlərin hamısı MTN-in kurasiyasına daxil olub”. 

 

Müsahibimizin sözlərinə görə, əgər zərərçəkən tərəf kimi tanınmış Elmar Hüseynovun ailəsi (həyat yoldaşı, qardaşı, bacısı) yenidən müraciət etsə, bu, işə müsbət təsir göstərəcək. Ş.Xuduoğlu E.Hüseynovun hazırda Norveçin paytaxtı Osloda yaşayan həyat yoldaşı Ruşaniyyə Hüseynova ilə hər hansı kontaktları olmadığını bildirdi. E.Hüseynovun ölümündən sonra yaratdıqları Elmar Hüseynov Fondunun isə R.Hüseynovanın mühacirətindən sonra fəaliyyətini dayandırdığını xatırlatdı: “Amma bütün hallarda Ruşaniyyə Hüseynova zərərçəkən kimi özü yenidən müraciət edə bilər". 

 

E.Hüseynovun bacısı Elmira Hüseynova isə daha öncə “Yeni Müsavat”a açıqlamasında bildirmişdi ki, qardaşının qətlinin açılacağına inamı yoxdur: “Bura Avropa, Amerika olsaydı, bəlkə də ümidim olardı. Öz adımdan bu 10 ildə heç vaxt ümidim də olmayıb”. (musavat.com)