"Azərbaycan Taekvando Federasiyasın (ATF) məhkəməyə vermişəm. Oktyabrın 5-də də CAS-da məhkəmə oldu. Vəkilimlə birlikdə orda təmsil olunduq". Bu sözləri "Qafqazinfo"ya açıqlamasında Azərbaycan millisinin sabiq taekvandoçusu, hazırda Türkiyə yığmasında çıxış edən Nur Cəmrə Kaymak deyib. İdmançı Azərbaycan Taekvando Federasiyasını məhkəməyə verdiyini etiraf edib. Lakin o bunu hansı səbəbdən etdiyini məhkəmə qərarına əsasən deyə bilmədiyini dilə gətirib: "Amma məhkəmənin qərarına görə çox danışa bilmərəm. Həqiqətən 2013-cü ildə Azərbaycan yığmasında çıxış etmişəm. Sonradan federasiya ilə aramızda bir sıra problemlər yaşadıq. Çox danışdıq və razılığa gəlmək istəsək də, alınmadı. Onlar məni başa düşmədilər. Bu səbəbdən də məhkəməyə müraciət etməli oldum". Qeyd edək ki, bir müddət öncə bununla bağlı xəbər yaysaq da, federasiyanın vitse-prezidenti Nağı Səfərov saytımıza açıqlamasında Azərbaycan yığmasında belə bir idmançının çıxış etmədiyini bildirmişdi. (qafqazinfo)