İsrail rejiminin cinayətlərinə, Azərbaycanda azan qadağasına, məscidlərin sökülməsi və sonuncu təhsil sistemində hicab qadağasına etirazlarda Hacı Abgül Süleymanov öndə gələn şəxslərdən biridir. 

O, həmçinin düşmənə ağır itkilər vuran Şəhid Mübariz İbrahimovun tanınmasında böyük xidmətə sahibdir.

Müsəlman ölkəsində İslam dininə qarşı yürüdülən sərt siyasəti təqdin edən ruhani 11 avqust 2011-ci ildə MTN əməkdaşları tərəfindən saxlanılır və 1 il istintaq müddətindən sonra Bakı Ağır Cinayətlər Məhkəməsi ruhaniyə 11 il həbs cəzası verir.

MTN təcridxanasında saxlanılan Hacı Abgül Süleymanov 1 il müddətdən sonra Penitensiar Xidmətin 13 saylı cəzaçəkmə müəssisəsinə köçürülür. Lakin o, təxminən 6 aya yaxın müddətdə cərimə kamerasında saxlanılır. Daha sonra Qaradağ rayon Məhkəməsi Hacı Abgülün 6 ay müddətinə Qobustan qapalı tipli cəzaçəkmə müəssisəsinə köçürülməsinə qərar verir. Ölkənin tanınmış ruhanisi Hacı Abgül Süleymanov Puta qəsəbəsində yerləşən 13 saylı ağır cəzaçəkmə müəssisəsində saxlanılsa da, daha sonra bəhanələr gətirilərək 2 dəfə (1-ci dəfə 6 ay, 2-ci dəfə 1 il müddətinə) 8 saylı qapalı tipli cəzaçəkmə müəssisəsinə köçürülüb. Hazırda da 8 saylı QCÇM-də saxlanılır. 

Hacı Abgül Süleymanov Cinayət Məcəlləsinin 283.2.1 (Zor tətbiq etməklə və ya zor tətbiq etmə hədəsi ilə törədildikdə milli, irqi, sosial və ya dini nifrət və düşmənçiliyin salınması (üç ildən beş ilədək müddətə azadlıqdan məhrum etmə ilə cəzalandırılır), 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə (şərti maliyyə vahidi məbləğinin beş yüz mislindən min mislinədək miqdarda cərimə və ya iki ilədək müddətə islah işləri və ya eyni müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır), 234.4.3-cü (Qanunsuz olaraq külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) və 228.1-ci (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə ittiham olunub.

Hacı Abgül Süleymanovun həyatı əsasında sənədli film, çıxışlarını ehtiva edən müxtəlif video çarxlar hazırlanıb onun adına müsiqilər yazılıb.