İslamazeri.az-ın verdiyi xəbərə görə, Abgül Süleymanovun bayram təbrikində deyilir: 

“Bismi Təala. Onların nə əti, nə də qanı, əlbəttə, Allaha çatmaz. Allaha çatacaq olan yalnız sizin təqvanızdır. Allah sizi doğru yola yönəltdiyi üçün Onu uca tutasınız deyə, bunları sizə belə ram etdi. Ehsan edənlərə müjdə ver!” (Həcc 37)

İlk öncə bütün müsəlman xalqımızı, dünya müsəlmanlarını bu müqəddəs bayram münasibətilə təbrik edirəm. Allah Təala bütün bu bayramları zamanın Höccətilə qeyd etməyi nəsib etsin!

Əlbəttə ki, təkcə qoyun başı kəsmək  Allaha yaxınlaşmaq demək deyil. Çünki bu bayramın ilk səbəbkarı olan İbrahim (ə) bizlərə bunu sübut etmişdir ki,  Qurbanlıq onun bütün ömrünün məhsulu idi. Əlbəttə ki, bu ona verilən dünyadakı hədiyyə idi. Axirətdə isə İbrahimi (ə) daha böyük əcr gözləyir. Bayramın yaranmasına diqqət etsək, bu İbrahimin (ə) imtahanlarından sonra verilir. Bir sözlə İbrahim peyğəmbərin (ə) bütün imtahanlardan üzüağ çıxmasının - ən gənc yaşlarından bütpərəstlərlə mübarizəsi, özünün oda atılmasına, həmçinin səhrada ailəsinin susuz tənha qalmasına və 13 yaşlı oğlunun Qurban kəsilməsinə razı olmasının - məhsulu Qurbanlıq oldu. İbrahim Xəlilullahın (ə) qəlbi Allah məhəbbətilə dolu olduğu üçün digər bütün məhəbbətləri yandırmışdı. Elə bu, Allaha fəna olmaq deməkdir. Yəni ilahi eşqlə həşr olmuş, bütün varlığı ilə yəqinə çatmış bəndə iqrar edir: “Allah, yalnız Sən, Səndən başqa hər nə varsa fanidir. Bir sözlə bu aşiq və məşuqun bayramıdır. Odurki, Allaha aşiq olanlar, Allahın razı olduğu bəndələrin bayramıdır. Bayramınız Allah Təala tərəfindən mübarək olsun!"