İslamazeri.az-ın kürd mediasına istinadən verdiyi xəbərə görə, bir neçə gün öncə İranda kürdlərin sıx yaşadığı Mahabad şəhərində 4 ulduzlu "Taha" otelində işləyən Fərinaz Hüsrəvani adlı  qız özünü  işlədiyi otelin 4-cü mərtəbəsindən aşağı ataraq intihar edib.

Bundan sonra, əhali otelin qarşısına yığılaraq etiraz ediblər.

Polisin əraziyə gəlməsi toqquşmalara səbəb olub, 18 nəfərin xəsarət aldığı bildirilir.

Mahabad meri Cəfər Kətayi təcavüzə cəhdi təsdiqləyib...

Mahabad meri Cəfər Kətayi  Fərinaz Hüsrəvaninin intiharı ilə bağlı istintaq araşdırmalarının bitməsini gözləməyə çağırıb.

Mer rəsmi xəbər agentliyi olan "IRNA"ya açıqlama verərək bildirib ki, telefon danışıqları, təhlükəsizlik kameraları və bütün dəlillər araşdırılır. Mer həmçinin Fərinaza qarşı təcavüzə cəhdə ittiham olunan şəxsin həbs edildiyini də önə çəkərək deyib: "Şübhəli şəxs qismində bir nəfər həbs edilib. Lakin həbs olunan şəxs bəzilərinin iddia etdiyi kimi, heç bir rəsmi qurumun işçisi deyil, o otel işçilərindən biridir".

"Rudav" kürd telekanalının məlumatına görə, otelin müdiri Təbriz şəhərində qeydiyyatda olan Mürtəza Haşimi həbs olunub.

Vali yardımçısı Əlirza Razifər da açıqlama verərək, polisin etirazçılara çox yumşaq davrandığını, lakin etirazlarda şiddət artacağı təqdirdə əlavə tədbirlər görüləcəyini bildirib. Razifər həmçinin kürd gəncləri xarici kəşfiyyat qurumlarına bağlı saytlar tərəfindən etiraza cəlb etdiyini və yalan məlumatlarla etirazları alovlandırmaq istədiyini qeyd edib.

Qeyd edək ki, İranda fəaliyyət göstərməyən kürd saytlar Fərinaz Hüsrəvaninin İranın hüquq mühafizə orqanlarının əməkdaşları tərəfindən zorlamadan qaçaraq intihar etdiyini yaymışdılar.