İslamazeri.az-ın Kuveytin  “Əl Rai” qəzetinə istinadən verdiyi xəbərə görə, İranın 350 minlik əsgər və zabitindən ibarət İran-İraq sərhədinə cəm edilmiş ordusu hər an  İŞİD-ə qarşı döyüşə qatılaraq müqəddəs ziyarətgahların müdafiəsini həyata keçirə bilər.

Kuveyt qəzeti bu iddiaları İranlı məsul şəxsə istinadən yayıb.

Məlumatda bildirilir ki, İraq ordusunun izni olarsa, İran ordusunun 350 minlik qoşunu İŞİD-ə qarşı geniş çaplı əməliyyata başlaya bilər.

İranlı mənbənin sözlərinə görə, İran İŞİD-i böyük təhlükə olaraq görür və bu təhlükə təkcə İran İslam Respublikası üçün deyil, həmçinin müqəddəs Kərbəla və Əsgəriyyə ziyarətgahları üçün də keçərlidir: “Buna görə də, İran ordusunun elit qüvvələri hərbi hazırlıq vəziyyətinə gətiriliblər. Düşmənin Kərbəlaya yaxınlaşması baş verərsə, İran ordusu əməliyyatlara start verəcək”.

İranlı mənbə həmçinin bildirib ki, İran tərəfi İraq ordusuna demək olar ki, hər gün hərbi mütəxəssis və silah yardımı edir.

Mənbə onu da bildirib ki, İran tərəfi  praktiki olaraq İraqın hərbi ehtiyyaclarını təmin etməklə yanaşı, elektron kəşfiyyat sahəsində və havadan müşahidə sahəsində də dəstək verir.

İranlı mənbə ABŞ və Qərb ölkələrinin hərbi koalisiyasının İŞİD-ə qarşı əməliyyatlarını da tənqid edərək, koalisiyanın İŞİD-ə qarşı ciddi bir mübarizə aparmadığını deyib: “Bu cür addımlar Bağdadı ciddi təhlükə ilə üz-üzə qoyub.”

Mənbə, İranın İraqın suverenliyini təhlükə altına qoyacağı haqda bəzi fikirləri də tənqid edərək: “Bu xəbərlərin zərrə qədər həqiqəti yoxdur və İran ancaq İraq hökümətinin izni ilə addım ata bilər”- deyib.