İslamazeri.az RT-ə istinadən xəbər verir ki, kürd “Xalq Qoruma Birlikləri”-nin nümayəndəsi Ridur Xəlil bildirib ki, kürd könüllüləri Palmira yaxınlığında həlak olmuş baş-leytenant Aleksandr Proxorenkonun cəsədini Rusiya hökumətinin nümayəndələrinə ötürüblər. Onun məlumatlarına əsasən, rusiyalı hərbçinin cəsədi artıq Rusiyaya çatdırılıb.

Ridur Xəlil deyib: “Kürd xalq qoruma birlikləri Rusiya Federasiyası hökumətinin xahişi ilə Tadmor yaxınlığında öldürülmüş rus hərbçisinin cəsədini əldə edə biliblər. Bu bizimlə (XQB) İŞİD arasında baş tutan danışıqlar nəticəsində əldə olunub. Bu xüsusi əməliyyat humanitar məqsədlər çərçivəsində həyata keçirilib. Hərbçinin nəşi Rusiya hökümətinə təhvil verilib.”

Xatırladaq ki, Aleksandr Proxorenko Suriyanın Palmira şəhəri yaxınlığında terrorçulara avia-zərbələr endirdiyi zaman həlak olub. Terrorçular onun yerini tapıb onu mühasirəyə alan zaman, zabit Proxorenko özünə atəş açıb. Rusiya Müdafiə naziri Proxorenkonun ölümü haqda məlumatı martın 24 yayıb.