İslamazeri.az-ın  "Reuters" agentliyinə istinadən verdiyi xəbərə əsasən, “Taliban” terror təşkilatının bir qolu olan “Camaatul-Əhrar” Pakistanın Kvetta şəhərində yerləşən xəstəxanadakı partlayışın məsuliyyətini öz üzərinə götürüb.

Son məlumata əsasən, partlayış nəticəsində 93 nəfər həyatını itirib, 50-dən çox insan isə yaralanıb.

“Camaatul-Əhrar”  bu hücumun məsuliyyətini öz üzərinə götürür və bu cür hücumları davam etdirməyə söz verir. Biz tezliklə bu haqda video hesabatı paylaşacağıq.”, - deyə “Taliban” hərəkatının nümayəndəsi Ehsanullah Ehsanın elektron məktubunda deyilir.

Partlayış bazar ertəsi günü səhər tezdən Bəlucistan Vəkillər Kollegiyası Assosasiyasının keçmiş prezidenti Bilal Ənvər Kəsinin öldürülməsindən bir neçə saat sonra baş verib. Onun nəşi xəstəxanaya çatdırılıb, bir müddət sonra isə, tibb müəssisəsinə onun kolleqaları, tanışları və KİV nümayəndələri gələn zaman partlayış baş verib. Bir neçə vəkil yaralanıb, 1 jurnalist həyatını itirib, daha biri isə ağır xəsarətlər alıb. Bəlucistan əyaləti DİN başçısı bildirib ki, partlayışı kamikadze törədib. Hərbi istehkamçılar qrupunun məlumatına əsasən, kamikadzenin kəmərində 8-10 kiloqram partlayıcı maddə olub.