İslamazeri.az-ın "Daily News Egypt"-ə istinadən verdiyi xəbərə görə, Misirdə çevrilişlə vəzifəsindən uzaqlaşdırılan ölkənin ilk seçilmiş prezidenti Məhəmməd Mursi məhkəmə iclasında, "Mən hələ də bu ölkənin prezidentiyəm", -deyə bildirib. Məhkəmə mənbələrindən əldə edilən məlumata görə, Qahirənin cənubundakı Tora həbsxanasında Mursinin şahid olaraq dinlənəcəyi 2013-cü ilin yanvar ayında baş verən Port Said hadisələri ilə bağlı cinayət işinin məhkəmə iclası keçirilib. Məhkəmə iclasından öncə məhkəmə işini rədd edən və əvvəl müdafiə üzrə nümayəndə heyəti ilə görüşmək istəyən Mursi, "Mən hələ də bu ölkənin prezidentiyəm. Konstitusiyaya görə, adi məhkəmələr mənimlə istintaq aparmaq hüququna malik deyil", -deyə bildirib.

Xatırladaq ki, Misirin şimal-şərqində yerləşən Port Said şəhərində 2013-cü ilin yanvarında "Əl-Arab" polis mərkəzinə basqın təşkil olunduğu və baş verən hadisələrdə 5 adamın həyatını itirdiyi bildirilmişdi.