Baş Prokurorluğun mətbuat xidmətinin rəhbəri Eldar Sultanov az əvvəl mətbuata açıqlamasında Türkiyədə dövlət çevrilişinə cəhddə ittiham olunan Fətullah Gülənin tərəfdarlarının Azərbaycanda qanunsuz hərəkətlərinin qarşısının alınması məqsədilə Baş Prokurorluğunun Ağır Cinayətlərə Dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlandığını bəyan edib.

Prokurorluq sözçüsü bu fuikirləri səsləndirsə də konkret ad və faktlar göstərməkdən imtina edib. Bəs görəsən, Eldar Sultanovun dediyi cinayət işində kimlərin adı keçir və onlar hansı cinayətlərdə ittiham olunur? Gununsesi.info-nun əməkdaşı elə bu sualla onun özünə müraciət edib.

Saytımızın sorğusuna cavabında haqlarında cinayət təqibi başladılan şəxslər haqqında məlumat verməyən E. Sultanov bunu istintaq sirri adlandırıb: “Əgər məsləhət olsaydı, Cinayət Məcəlləsinin müvafiq maddələrinin adını yazardıq. Deməli, hələki bu məqsədəuyğun deyil”.

Siyahıda ictimai əhəmiyyət kəsb edən tanınmışlardan kimlərin adının olmasına gəlincə, E.Sultanov qeyd edib ki, bu istintaq sirridir: “Bu haqda məlumatsızam. Əgər kiminsə belə şəxslər haqqında məlumatı varsa, onların adlarını deməklə istintaqa yardım etmiş olacaq. Belə şəxslərə hədiyyə də veriləcək”-, deyə o, yarızarafat- yarıgerçək vurğulayıb.