İslamazeri.az xəbər verir ki, bu gün UEFA Avropa Liqasının qrup mərhələsinin püşkatma mərasimi keçirilib. Monakoda baş tutan tədbirdə ardıcıl ikinci dəfə bu mərhələyə yüksələn “Qəbələ”nin növbəti rəqibləri bəlli olub. Püşkün nəticələrinə əsasən, “qırmızı-qaralar” C qrupunda yer alıb. Roman Qriqorçukun yetirmələri 1/16 finala vəsiqə uğrunda “Anderlext” (Belçika), “Sent-Etyen” (Fransa) və “Maynts” (Almaniya) klubları ilə mübarizə aparacaq. Dairəvi sistemlə iki dövrədə keçiriləcək qrup mərhələsinin oyunlarına sentyabrın 15-də start veriləcək. Komandamız növbəti matçlarını sentyabrın 29-da, oktyabrın 20-də, noyabrın 3-də, 24-də və dekabrın 8-də keçirəcək.

Xatırladaq ki, “Qəbələ” I təsnifat mərhələsində Gürcüstanın “Samtredia” klubunu (5:1, 1:2), II təsnifat mərhələsində Macarıstanın MTK komandasını (2:1, 2:0), III təsnifat mərhələsində Fransa “Lill”ini (1:1, 1:0), pley-offda Sloveniya “Maribor”unu (3:1, 0:1) mübarizədən kənarlaşdırıb.