İslamazeri.az-ın Əfqan mediasına istinadən verdiyi xəbərə görə, “Taliban” terrorçuları Gilmənd vilayətində dövlət binalarına hücum edib.

Yerli mənbələrin verdiyi məlumata görə, hadisə Gilmənd vilayətinin Musa-Qala şəhərində baş  verib. Dövlət binalarına hücum edən “Taliban” terrorçuları polis və əsgər daxil olmaqla 11 nəfəri qətlə yetirib.

“Khama Press” agentliyinin verdiyi  xəbərə görə, “Taliban” terrorçuları vilayət administrasiyasına  və yerli xəstəxanaya hücum edərək orada olan bütün avadanlıqları yandırıblar. Bundan əlavə, iki təcili tibbi yardım avtomobili yandırılıb.

Xatırladaq ki, uzun illər boyunca Əfqanıstanda “Taliban” terrorçuları fəaliyyət göstərir. Terrorçular mütəmadi olaraq dövlət və xarici ölkə səfirlikləri, ABŞ ordusu və müttəfiqlərinin hərbçilərinə hücumlar təşkil edirlər. “Taliban” terror təşkilatının fəaliyyəti nəticəsində on minlərlə insan həyatını itirib.