İslamazeri.az-ın rus mediasına istinadən verdiyi xəbərə əsasən, Türkiyə prezidenti Rəcəb Tayyib Ərdoğan bildirib ki, rəsmi Ankara rəsmi Vaşinqtonla Suriyada "Fərat Qalxanı" əməliyyatının keçirilməsi ilə əlaqədar əməkdaşlıqla bağlı heç bir çətinlik çəkmir.

"ABŞ-la Ər-Raidə (Suriyanın şimalı, Hələb əyaləti) işləmək bizim üçün çox rahatdır. Biz Cərablusda əməkdaşlıq edirik və etməyə də davam edirik.", - deyə Çinin Xançjou şəhərində keçirilmiş G20 sammitindən qayıdan Ərdoğan təyyarədə jurnalistlərə bildirib.

O, əlavə edib ki, 40 kilometr enindəki Suriya-Türkiyə sərhədi boyunca uzanan 95 kilometrlik səhənin İŞİD terror təşkilatından azad edilməsi üzrə birgə əməliyyat planı hələ ötən ilin noyabr ayında müzakirə edilmişdi.

Xatırladaq ki, Türkiyə ordusu avqust ayının 24-ü Suriyanın şimalında yerləşən Cərablus şəhərinin terrorçulardan azad edilməsi üzrə əməliyyata başlayıb. Əməliyyatın adı "Fərat Qalxanı"dır. Bununla yanaşı Ankara Suriyanın kürd dəstələrinə qarşı əməliyyatı da davam etdirir.